Ene Pretorius van doer uit die RSA uit, skryf in ons plaaslik Republikein 'n brief waarin hy huil oor die groot bedrag wat hy moes hoes op die grens toe hy vis uit Namibië wou terugvat na die RSA toe.   Hy baklei met ons land se owerhede en hoe hulle toerisme doodmaak, ens., ens.

Toe antwoord Hannes Holtzhausen [van Seevisserye] hom en vertel hom dat die R505 invoerpermit wat hy vir vis op die grens moet betaal, deur die SA regering vasgestel is!   Verder sê hy ook dat die visvang langs ons kus daar is vir besoekers om dit te kom geniet en heerlik aan die vis te smul, maar nie daar is sodat jy 'n klomp vis kan vang en dit vir jou familie en vriende in die RSA gaan uitdeel nie.   Hy vra dat die ou volgende keer sommer vis in SA koop en aan sy mense skenk en dan tuis bly want Namibië het nie hierdie klas van toeris nodig nie.

En daar vat hy die gevoel van meeste van ons Namibiërs saam in een kort briefie.   Ons is al só gatvol om te hoor van hoe min die vis deesdae is en dat dit nie meer die moeite werd is om die lang pad hiernatoe aan te pak nie.   Ons land is mos omtrent die enigste plek waar sommige mense mos reken hulle kan hier kom visvang en dan moet die vis vir sy vakaknsie betaal.   Nou wonder ek, wat kan mens in SA gaan stroop om dààr vir ons besoeke te kan betaal???